老广话事•粤语新闻：家有奇猫

　　新快报讯（记者刘军）住在北京路附近嘅鄢小姐发现隔离屋有只好鬼马（特别有趣）嘅猫仔，佢通体雪白，但两只眼就一只浅蓝色，一只浅啡色，认真（十分，相当）少见。

　　记者扑过去采访，发现呢只猫仔果然好似传说中咁鬼马兼靓仔，而且好好人缘添，路过嘅市民，凡係睇到佢，都想同佢玩，仲有好多人要同佢影相添！成个明星咁！好彩佢又唔会摆大牌，有人叫到，都会好大方咁俾面合影，仲会尽量摆番个好开心嘅甫士（pose译音

，姿势）添。

　　主人林姨话，只猫仔係半年前人哋送俾佢嘅，都唔知佢係咩（什么）品种，更加唔知佢对眼点解会生成咁。

　　虽然只猫仔好勤力捉老鼠，不过佢唔中意食老鼠，只係中意食鱼。林姨个孙见佢咁腌尖（挑剔），就同佢安咗个花名叫“懒猫”。“懒猫”唔识反抗，唯有认“名”啦！不过唔好就咁认为佢好虾（好欺负）就同佢玩过火，佢分分钟会“发烂咋”（抓狂）架。

　　结果，记者即时中招！记者同佢玩下玩下，佢突然间猛扑过嚟，记者只手即时见血！可怜记者一大早就要去疾控中心交咗两百几蚊打疫苗！（报料人鄢小姐报料费50元）

　　（侯颖／编制）