老广话事•粤语新闻：QQ号"神奇易主"新老主人网上对骂

　　新快报讯（实习生王白石记者任磊斌）明明通过正常渠道申请咗个QQ号码，唔知点解变咗“偷号”，仲比QQ号原来嘅主人无喇喇（无端端）省（骂）咗一餐。上个礼拜五，广州碧桂园嘅林小姐就因为呢件事，同人哋打咗场“网络骂战”。

　　林小姐话，上礼拜五朝早，佢通过正常途径申请倒一个新嘅QQ号。呢头啱啱（刚刚）登录，果头就有个网名叫做“小小屁孩”嘅女仔问佢是咪真係呢个QQ号嘅主人，仲好恶死

咁（很凶地）质问佢：“哼，你偷人哋嘅QQ号仲咁嚣张！”

　　尽管对方咁野蛮，林小姐依然好有礼貌咁问佢係咪太长时间冇登录QQ，号码比人收返，点知个网友好肯定咁话：“我寻日仲用紧呢个号呢！”跟住，“小小屁孩”就开始用好难听嘅粗口闹林小姐。林小姐嬲起嚟，就从网上下载咗个“骂人宝典”反击，对手好快就收声。

　　几个钟头之后，一个叫做“光荣的营销”嘅群里面几个网友又揾到林小姐，话係“小小屁孩”嘅朋友。林小姐只好又解释多镬。但呢班人同“小小屁孩”一样咁恶，一上嚟就吵妈拆蟹（说脏话）。林小姐又放出“骂人宝典”，果班人卒知又落晒线。

　　记者就此采访咗腾讯公司，腾讯表示，喺收翻QQ号嘅时候，虽然会将原用户嘅注册信息删晒，但号码里面联系人嘅信息就唔保证可以全部删除。到目前为止，佢哋仲喺第一次遇到林小姐呢种个案，暂时冇办法解释号码“易主”嘅原因。佢哋话，如果“小小屁孩”坚持认为个QQ号係佢嘅，可以上网填个“号码申诉表”同佢哋交涉。

　　（侯颖／编制）