争厕所霸厨房 街坊嘈到“面阻阻”

　　新快报讯（记者 任磊斌刘军）前几日，记者接到个投诉电话，一位姓张嘅婆婆话佢俾人迫害得好紧要。记者寻日于是摸咗去南箕中约大街。原来係隔离两家人为咗啲湿碎嘢（小事情）喢气（吵架）。

　　住喺海珠区南箕中约大街某号201嘅张婆婆一见到记者，即刻就将佢俾人“迫害”嗰啲嘢现场展示咗一次。虽然佢个厨房门同厕所门都塔（锁）到实实，但唔知点解，厨房里边

个风炉（烧柴的小火炉）会俾人打烂，储水箱会俾人淋油，厕所会有人入去乱咁屙屎……佢话係有人专登（故意）整估佢。

　　张婆婆仲专门点咗住喺204房嘅李生嘅名，话佢成日同佢作对，仲经常对佢郁手郁脚添。记者行过去204房，净係得李师奶喺屋企。李师奶一讲起张婆婆就嬲：“唉，我都懒得理佢啊。而家我都俾晒个厨房佢用，自己喺阳台搭个棚放个炉煮食就算嘞……佢郁啲就又居委又报警咁，真係好鬼烦啊！”记者又问附近几个街坊，佢哋都话张婆婆好恶死（凶）咁话。

　　而家政府鼓励建设和谐社区，街坊邻里互相迁就吓，就咩事都好话为啦；更加唔好为咗啲湿碎嘢就吓吓报警，咁会浪费国家资源架嘛！

　　（金陵／编制）