老广话事•粤语新闻：父子同泳过父亲节

　　新快报讯（记者任磊斌）除咗母亲节，父亲节几年嚟都开始慢慢受到后生仔女关注，好多人好似过母亲节咁，陪老窦（爸爸）饮茶、买礼物送比老窦。但咁啱，18号嗰日系荔湾区游珠江测试日，係咿到记者见到父子同泳过父亲节啵。

　　星期日一早嘅西郊泳场人头涌涌。荔湾不愧系游泳之乡，场面好鬼火爆。而且西郊聚集嘅几乎清一色系老广州，啲人讨论起游水心得都格外有亲切感。

　　一样有落水游嘅记者係男更衣室同阿黄先生倾（讨论）咗起身，佢话：“我同个仔一齐嚟游嘎，我个仔无我咁犀利，我游完2000（米）仲游多咗10几个圈，加埋起码游咗三千几啦。我个仔游够就上咗水喇。”记者继续问佢，你个仔几岁啊？“今年13啰，平时我就几乎日日游，佢就一个星期一次倒（左右）啦。”黄先生话。

　　“你知唔知今日系父亲节啊？”记者问。

　　“哦，好似系啩。个仔提过一下。”黄先生答。

　　“咁，咁啱一齐测试达标咪好有意思？”记者问。

　　“系啊，系啊。今晚同个仔喋番杯庆祝吓先！”黄先生讲完，急急脚就走喇，“我个仔係出面等紧我啊，拜拜！”

　　（侯颖／编制）