月饼出街诸饼让路

　　本站新闻稿件与图片版权归广东新快报社所有，未经授权不得转载。

　　粤语新闻老广话事

　　新快报讯（记者 任磊斌 许力夫）踏入农历八月，中国人年中最大嘅节日——中秋节就嚟到啦，月饼成为市面上最主要嘅消费品。由于月饼毛利好高，商家博命抢市场，搞到好多日常嘅商品都要让路。

　　广州市以前上市嘅月饼，一直都係几间老字号酒家同几间食品厂嘅出品最出名。不过近几年，越嚟越多西饼企业加入中式月饼竞争，好似利口福啊、东海堂啊、皇冠玛莉奥啊、雪贝尔啊、萨比诺啊等等，大街小巷嘅西饼铺头都俾金色、红色、紫色嘅月饼盒占领晒。不过，而家月饼上市上得太霸道啦，直程干扰咗广州人嘅正常生活。琴日记者係龙口西一间西饼铺头见到，四分之三嘅空间都摆满晒月饼，常规点心西饼就逼埋喺角落度，好唔起眼。见记者投诉，店员话：“无办法啦，做生意赚钱，老细要求咁做嘎。”

　　上班族许生住喺越秀区旧城，佢都话，平时一早返工必定会帮衬嘅嗰间饼店，近排都係铺满月饼，买早餐高峰期，十几人逼埋一个角落头买面包、买三文治，多少有啲唔方便。佢话，希望啲饼店揾大钱之余都顾下啲熟客嘅感受啦。