天气阿姐心情报告

　　早晚北风凌厉，中午阳光普照，咁样嘅天时，着多着少都唔多适合，分分钟仲会感冒，所以阿姐建议各位带多件厚衫喺身， 天时，最啱就系成班人围住暖笠笠嘅火炉食住鲜嫩可口嘅食物，温馨之余又保暖，仲可以边食边吹水。阿姐琴日同大班同事就去试咗猪肚包鸡，几正噶，大家不妨去试下。

　　晴到少云15℃～24℃湿度：30%～50% 和缓东北风

　　旧历九月廿五 宜：启钻 除服 成服 忌:馀事勿取

　　化妆指数 保湿

　　呢段时间，冷风呼呼，皮肤相当干燥，贪靓嘅白领一定都身同感受。因此，高水分嘅保湿霜就唔少得啦。

　　感冒指数 小心中招

　　日夜温差大，啱啱出被窦(被窝）特别容易冻亲，不断打乞嗤、流鼻涕，真系好辛苦，一唔小心就会感冒，所以各位白领呢段时间记得注意身体。

　　压力指数 齐齐甩

　　上周六，以“生活如此多娇”为主题嘅减压活动喺潮人“蒲点”地王广场展开。上百高压白领参与，共同将压力甩入巨桶，阿姐觉得呢种做法十分有效，大家不妨学下，用力释放压力，唔好再屈住屈住啦。

　　游旧时建筑指数 高

　　城隍庙、万木草堂呢两间相距唔远嘅旧时建筑，已经全部正式开张迎客啦！一边系香火鼎盛嘅寺庙，一边系“无价宝”装满嘅小小博物馆，两边都十分吸引噶。

　　搭地铁指数 去机场

　　通往机场嘅地铁已经开通啦！阿姐身边嘅朋友甚至“姐妈”都话要去机场兜个圈。各位平时做开“空中飞人”嘅白领都不妨加入呢个“一日游”提前探路，下次坐飞机时有信心D。哈！

　　围脖指数 潮

　　今年唔少时尚潮牌都出咗“围脖”——即系一条超长嘅围巾，连续围几圈，又暖又潮，加上同围脖（微博）同名，简直可以称为今季潮物，各位白领喇喇林整番条。

　　（整理 郭晓燕 漫画 王云涛）