□见山见水
丽丽看到儿子带了女朋友回来,心情特别激动。“小明,这位是……”“噢,姆妈,伊是我同学阿雯。阿雯,这是我的妈咪和爹地。”小明向阿雯介绍了自家爷娘。阿雯马上用不大标准格普通话甜甜叫道:“伯伯、阿姨好!”小姑娘一副山清水绿买相,看得丽丽邪气开心,伊偷偷傍阿三霎了霎眼睛——正宗咯!
一家们出仔浦东机场,就直接乘上了磁悬浮列车。
到仔屋里厢,丽丽忙开了。小明房间老早收作好了,哪能安排小姑娘倒是一个不大不小问题。丽丽拖阿三到一边,“老公,侬看迭格阿雯哪能蹲法?”阿三看看老婆,心想侬搿个女人也真是多管闲事啦。“搿种事体么,还是等一歇问儿子伐,由伊自家去决定好嘞。”
夜里厢,一家们坐好吃夜饭。想不到,阿雯来得欢喜吃丽丽做咯糟货,特别是糟鸭舌,还有糟脚爪。看得丽丽开心煞,伊也多喝了几杯啤酒。“小明,阿雯夜里住了啥地方?”闲话一出口,心里倒有点慌了,生怕儿子尴尬。
【关键词】买相,一般指面孔,也可泛指人的整体形象。