□见山见水

　　丽丽吃了一口老酒，看牢美美红得来像兔子咯眼睛，“要讲阿拉搿个阿三么，比比外头一眼东晃西晃咯男人么，肯定算不错咯。不过……”

　　“不过啥啦，侬讲呀讲下去呀！ ”美美是个急性子女人，听丽丽闲话只讲一半，一发急，嘴巴里就叫了起来。丽丽一看伊迭副氽头势，像煞地摊浪厢开哇抡咯女人，就乱笑起来，“哎，啥体啊，哇啦哇啦？慢慢听我讲。 ”

　　丽丽拿酒杯朝旁边一放，“其实也呒啥事体，就是伊一日到夜欢喜帮隔壁头女人忙，人家小姑娘发寒热，伊起劲来西送医院。嗤，管伊啥事体！”丽丽越讲越不适意了，上次阿三送隔壁小姑娘去医院咯事体，伊心里记了真牢。

　　“哦哟，阿姐啊，搿个也算事体啊，侬啊真是咯。倷公热心肠，助人为乐，好事体嘛。 ”美美笑起来了，“不过，侬看下来，伊拉关系平常哪能啦？ ”“嗯？蛮正常咯呀。 ”

　　丽丽听仔美美后半句闲话，心里倒有点紧张了。

　　【关键词】氽头势，口语，指模样。开哇抡，切口，指叫卖的情状。