□见山见水
丽丽登了美美屋里厢休息一阵,吃了两杯美美新泡格普洱茶,老酒么也差不多醒了,看上去一眼眼啊呒啥事体了。伊笑嘻嘻搭美美讲,“阿美,今朝阿拉邪气开心,哈哈……爽! ”伊看看美美,“不过,辰光也差不多了,今朝就不多陪侬了,我先回去了。”讲好就要起身,出门。美美听仔也一笑,“好咯呀,侬就早眼回去伐,否则那阿三要不放心了,呵呵。 ”丽丽听仔回头瞟了伊一眼,笑笑,走人了。
丽丽回到自家屋里厢,阿三人勿勒了屋里厢,啊不晓得跑到啥地方去了。丽丽也勿去管伊做啥了,自家到厨房间去准备两个人咯夜饭菜。弄到一半,阿三回来了。听到厨房间里有响声,阿三晓得是老婆回来了,就跑过来搭丽丽讲闲话。
“今朝白相了适意伐? ”
“嘿嘿,勿要太适意哦。叫侬一道去兜兜么,侬又勿肯去,只好阿拉两个女人潇洒了呀。”丽丽看了老公一眼,嘻嘻哈哈笑开了。
【关键词】辰光,口语,指时间。勿勒了,口语,(人)不在的意思。