粤讲越有料

　　上周高考放榜，无论官方点样三缄其口都好，“状元”始终都系市民、媒体嘅关注焦点。不过，高考除咗实力，临场发挥、运气等因素都好重要，所以，好多人都话，所谓“状元”，某个程度上都系“撞”返嚟嘅。

　　不过，并唔系所有“撞”都系好事。为咗■返被劫财物，开车撞死劫匪，惹官司上身，司机搞到一身蚁。若然一时贪念起又或者一时火遮眼，都好容易会撞板。未还赌债诈骗居民嘅社区干部同醉酒夜闹沐足城嘅男子，都系好好嘅反面教材。

　　栏目主持：张颖妍 漫画：张滨

　　本报6月30日报道，遇劫后司机驾车撞死劫匪，但司机也因“过失致人死亡”被检察机关批捕。而劫匪逃跑，事主失误将其撞死的行为究竟是“正当防卫”还是“防卫过当”，引起了不少专家的争论。

　　有嘢讲：俾人抢嘢，想第一时间追返自己嘅财物，都算系本能反应。点谂到，最终造成嘅系劫匪一命呜呼，自己又官司上身嘅“双输”结果，唏嘘背后仲有无言嘅残酷。我相信，无论系劫匪定系被抢嘅司机，乃至双方嘅家庭，呢个都系悲剧。“抢劫有风险”，而且风险巨大，可能会连命仔都冇埋，仲会连累他人，何苦呢？

　　本报7月2日报道，一男子深夜醉酒后来到大岭山一家沐足城宿舍楼底，与保安发生冲突后头部受伤。他称是保安伤人要向沐足城索赔，但沐足城则表示，男子是被开除后经常在沐足城闹事。

　　有嘢讲：哎，又系一则公说公有理婆说婆有理嘅纠纷。不过，无论系唔系保安打伤男子头部都好，饮醉酒去闹事，始终都系莽撞。更加唔好讲，若然酒后乱性，可能仲会有更加难以预料嘅可怕后果。

　　唔知系唔系天口热嘅原因，好似大家都比较容易起冲突。凡事冷静一D，千祈唔好冲动，更加唔好粗暴，咁样一嚟系自我保护嘅需要，二嚟又系以后自己可以据理力争，从法律渠道争取支持嘅保证。

　　本报6月28日报道，东莞高考传来喜讯，今年成绩全线“飘红”，2353考生达到了“重点线”，近47%考生顺利考上本科。其中，东莞中学与东华高级中学产生了高考文、理科总分“状元”。

　　有嘢讲：中国人嘅“状元”情结古已有之。其实我觉得都冇乜坏。既然“财富”可以光明正大咁排名，成为实力嘅表现，炫耀嘅资本，点解通过自身努力取得优异成绩嘅“状元”就唔可以晒下呢？更何况，高考成功者嘅经验有一定程度上嘅借鉴意义，学生、家长对“状元”故事嘅迷恋，亦都系人之常情，未必系所谓“炒作”嘅结果。不过，讲返转头，“状元”亦都只系一次考试嘅成功，无论高考系“撞圆”定系“撞扁”，呢个都系人生挑战嘅开始，唔好以为胜负已分。

　　本报7月2日报道，好赌的居民社区干部，为了偿还因赌博而欠下的大额高利贷，利用职权，以“帮人迁户”为幌子，诈骗居民过百万元。可就在警方开始调查时，当时人却“失踪”了。原来是高利贷债主担心其“走佬”，将之非法拘禁。

　　有嘢讲：系众多恶习入面，“烂赌”、“吸毒”、“好色”可以话系最恐怖嘅。本嚟系居委干部，家庭环境又唔错，点解要搞到债台高筑，如果唔系烂赌，又点会搞到俾“大耳隆”淋红漆“追数”咁狼狈。而且仲要衰到呃居民钱嚟还数，真系累人不浅。最终落得俾高利贷禁锢，又俾警方关押嘅下场，简直可以成为“赌博害人”同埋“好赌冇乜好下场”嘅又一个典型例证。