广是广非

　　□江晖（盘福路）

　　听到黄埔横沙村卜卜斋一条街可以喺改造中得以保留，我觉得十分高兴。对卜卜斋有热爱之情嘅，大抵有两种人，一种系以前读过卜卜斋嘅学生哥，一种就系热爱传统事物嘅“怀旧控”，我系后者，而我老窦则系前者。

　　我老窦六岁嗰阵，阿嫲为咗等佢早啲识多只字，就同佢报咗屋企附近嘅一间卜卜斋读嘞，仲一早买定只藤篋畀佢返学装书用添。开学嘅第一日，阿嫲晨七咁早就起身装香拜神拜祖先。之后煎咗一底薄罉，买咗几条葱、芹菜，连埋啲毛笔、墨条同墨砚一齐放入个藤篋度。薄罉就係用嚟黐住个屁股等你定条条坐好听书；芹菜就表示勤勤力力去读书；葱唔使讲都知道係表示聪明嘞。老窦就拎住呢篋咁有符弗嘅嘢去学堂嘞。

　　卜卜斋啲先生好严肃嘎，点似依家啲老师咁好相与。学生一有咩依喐，先生就罚佢抄书，抄得唔好嘅，就用把戒尺打手板，再严啲嘅先生仲会打头壳顶添，所以广东人幽默地称呢啲学堂叫“卜卜斋”嘞。旧时啲细路都好百厌嘎，上课倾计、发吽哣係小菜一碟，畀老师打係家常便饭。家长唔单只唔会怨老师打自己个仔，而且仲会话：“抵打，肯定拽先俾老师打嘞。”点似依家啲细路咁矜贵巴闭，家长当佢金笸箩，喐啲就话要告老师。就係因为先生嘅严格教导，日日督住班马骝背书写字，所以凡係读过卜卜斋嘅人都好叻嘎，古文掂不单止，而且写得一手好掂嘅毛笔字。

　　卜卜斋历年培育出无数国学高材，对发扬中国传统文化有莫大功劳。谂落，卜卜斋呢啲私塾学校，正正系今日民办学校嘅祖师爷。

　　本周微博值班记者孙莹 林劲松实习生赵玲张棹立

　　鸣谢所有出场网友