广是广非

　　□江晖(盘福路)

　　有报道称“非户籍人口更认同自家小区”。我哋老广州亦应该反思一下我哋今时今日嘅邻里关系到底如何。

　　我生于越秀山脚，长于越秀山脚，记得我细个嗰阵，晚黑间间屋啲人都坐喺门口透凉倾计，隔篱邻舍啲街坊，个个都识得，个个都好熟落。有间屋个婆婆因为同我阿爷同姓，就叫我阿爷做阿哥，我就叫佢做姑婆。后嚟大部分旧屋清拆，好多街坊都搬走晒，就拆剩我屋企呢边四间。而我哋间屋，而家就剩番阿嫲一个独居。隔篱住嘅伯伯婆婆都老晒嘞，老伴也都过身，不过街坊之间嘅感情就有增冇减，几家老人都成日窜门倾计，有碗数碗有碟数碟。之前几个独居老婆婆仲有打算晚黑轮流去彼此屋企瞓，好等三更半夜有个照应。如果边家有咩喜事，就一定敲锣打鼓咁话畀其他几家知道。啲老人仲好关心我哋啲细嘅，凡见到面，佢哋都会问我而家做嘢做成点呀等等。

　　旧时基本上冇“社区”呢个词，因为旧时邻里关系大多好紧密，彼此好似一家人。而今时今日，邻居关系疏远呢个话题好早就议论过，但我都冇去关心疏远嘅原因。我净系听过有个朋友话，依家个社会，你睇到新闻话边个中头奖，奖金几百万都可以冇反应，但你知道你隔篱屋个人发咗达或者过得好过你，就肯定会唔抵得，所以最好都係关埋栋门。嗱，呢个心态系错嘎，连非户籍人口都对自己所处社区有认同感、归属感，我哋老广系咪都应该多啲打开栋门，打开自己个心呢？

　　本周微博值班记者谢亮辉 张昊实习生 庞茗 陈艳娟 李雯洁

　　鸣谢新浪微博出场网友