晴到多云27℃到35℃湿度：45%～85% 轻微南到东南风

　　旧历六月廿二宜：嫁娶祈福求嗣开市交易立券入宅移徙

　　一唔落雨，成个广州又变成咗一个“焗炉”。周围都热辣辣，一出空调房，就会成身都湿晒，加上假期综合征作祟，心情真系好麻麻。天气太热嘅时候，“索”入太多汗，个人就好容易感冒嘎啦。所以，喺咁鬼热嘅天时，最佳嘅消暑方式，当然系留喺空调房度叹下空调啦。

　　交通指数

　　路况较好

　　落咗成个星期雨，今日终于守得云开见月明啦！路面干燥，路况较好，不过星期一通常比较塞车，各位司机大佬记得俾面今日嘅好天气，礼让D啊。

　　洗车指数

　　适宜

　　爱车“污遭”咗成个星期，今晚收工之后，喇喇淋带佢去洗白白啦。

　　约会指数

　　不适宜

　　周围都热辣辣，加上假期综合征作祟，今晚白领容易心情唔靓，外出约会唔单止有可能会因为毒辣嘅太阳败兴而归，仲容易发生争执，建议各位男朋友们都系暂时唔好约女朋友先啦。

　　运动指数

　　高

　　虽然今晚唔多适宜夜蒲同约会，不过运动就啱晒啦！好多白领都会有误解，以为做嘢辛苦或者压力大，就应该快D返屋企“疗伤”，其实做运动先系最好嘅发泄渠道，大家不妨尝试下啊！

　　美发指数

　　一般

　　虽然今日唔少有假期综合征嘅白领都会谂到去护理下头发，改变下心情，不过鉴于紫外线辐射强，呢种天气头发最紧要系保持清洁，注意防晒，其他护理暂时唔使住啦。

　　化妆指数

　　防脱水

　　天热，易出汗，建议使用防脱水化妆品，少用粉底和胭脂，经常补粉。

　　（整理 郭晓燕 漫画 王云涛）