三月十九

　　宜:纳采 嫁娶 理发 会亲友

　　忌：谢土 祈福 上梁 作灶

　　防晒指数：4

　　慢跑指数：3

　　糖水指数：5

　　多云，早晚有轻雾19℃～28℃

　　“唔准唔开心”，呢个系某个啤酒广告。不过，对于每个人嚟讲，似乎都系警世名言。热辣辣嘅天时，人嘅脾气似乎特别容易爆发出嚟。点“降火”呢？大热头好多人中意饮冻嘢，不过其实饮得太多汽水都系冇乜益。阿姐就中意饮清水啦。每日坚持饮8杯清水，既可以帮身体补水，又可以帮皮肤做美容。皮肤靓靓，成个人开心晒！

　　展览指数

　　去沙面睇“古董”

　　地界石、瓷瓶、老电表……呢D印记住沙面历史嘅“古董”，有D仲系喺亚运整饰期间挖出嚟嘅添！咁新鲜滚热辣又有沙面风情嘅文物，相信会吸引唔少本土文化爱好者去睇睇呢！

　　读书指数

　　多睇书品味高D

　　今个星期六（23日）是世界读书日啦，虽然平时都系要多读书充实自己，不过呢两日不妨做D新尝试，读多D“心灵鸡汤”类嘅书，观照下自己嘅内心。阿姐最近就睇紧《品味·男》呢本书，教人点打造有品味嘅男人，颇有收获嘎！

　　地铁指数

　　再增车厢唔使咁逼

　　对于唔少住番禺嘅朋友嚟讲，地铁三号线有咩风吹草动，都会引起佢哋嘅关注，不过今次传嚟嘅就系好消息！针对上落班高峰逼到尴尬嘅三号线，今年会增加26列列车！地铁公司仲发话，如果街坊有咩意见可以即管提，阿姐就最想地铁站有洗手间啦，你觉得呢？

　　维权指数

　　美容健身可退卡钱

　　喺美容院做fa-cial，唔满意服务想退钱？以前可能要同商家“拗数”，以后话唔定就有“大条道理”啦！听讲广州迟D会出台政策，规范美容、健身行业嘅预付卡消费项目，退卡退钱都有法可依，维权有保障啦！

　　（整理：陈颖雅 漫画：王云涛）