大洋新闻 时间: 2012-12-06来源: 信息时报

　　◎梁倩薇 编辑

　　圣诞新年就快到了，好多广州人又准备港澳自由行。不过，呢两年广州人游港澳，风格开始出现咗改变。

　　以前，去游香港必然系维多利亚港、太平山、海洋公园呢啲传统景点；澳门就系牌坊、新马路、葡京，等等。但近年，专门去港澳揾食嘅市民越来越多——食乜呢？未就系云吞、拉肠、炸大肠、牛腩面呢类小食咯。广州大把啦，而且，好多小食本身源自羊城，点解街坊要舍近求远去到港澳食呢？

　　原因就系两个字：地道。品味奄尖嘅广州人，对于小食嘅要求，唔止“抵食夹大件”咁简单。用料、手势、搭配是否依足传统，其实都有好大影响。此外，广州人对饮食文化、食肆嘅典故亦相当津津乐道，嗰啲伴随住几代人成长嘅老字号，每每带来一份亲切感，可以令人终生回味追寻。

　　然而，食物同食肆要做到呢两点，好依赖传承同发扬。呢一点上，部分食肆就有“传名唔传馅”嘅感觉。好似城中做肠粉好出名嘅一家肠粉店，本地人就认为佢哋未能符合期望。点解呢？行入店就知，拉肠师傅手势外行，腌肉味道古怪，细时都唔知有无食过广州肠粉，难怪“自成一格”了。反观港澳，许多店主都系几十年前从广州去到当地定居，一味小食坚持做几代，想唔好食都难了。

　　其实，本地食肆都有唔少传承多年，又平又好食，可惜藏身小街小巷无人知。希望旅游部门能够揾出呢啲小店，出行力去推，等多啲人知道，“揾食”唔使行咁远了。

　　（原标题：就近“揾食”）