大洋新闻 时间: 2012-12-07来源: 信息时报

　　◎阿六 律师

　　新闻讲：近日，新浪微博上出现了白鹤洞、瘦狗岭、桨栏路、第十甫等广州有趣的路名地名引来网友共鸣。

　　阿六讲：有趣嘅路名、地名通常有两个特点：一系有经典历史故事；一系有地方传统特色。瘦狗岭、桨栏路哩啲属有历史故事嗰种，而喺“传统特色”方面，广州有个地方嘅路名、地名，可以讲系全市“最具传统”，哩个地方就系芳村嘞。

　　芳村乜嘢最出名？唔使问阿贵——花卉。喺珠三角地区，讲到花卉产业，如果芳村认咗第二，肯定冇人敢认第一，因为芳村种花卖花已有1700多年历史。有咁巴闭嘅地方传统特色，点可以浪费呢，所以当地唔少路名、地名纷纷因“花”而生。

　　首先系以草花头嘅字命名嘅——

　　路名：芳村大道、花地大道、花蕾路、花湾路、芳兴路、芳信路、百花路、芙蓉路、荣兴路等；

　　地名：茶滘、葵蓬洲、蔗基、棉花村、菊树村等。

　　种花最紧要有咩嘢呢？水！因此芳村又有唔少路名、地名都识得傍“水”——

　　路名：东漖路、浣花路、海龙路、海中北路、凤池路、达江路、龙溪大道、东沙大道、涌岸街等；

　　地名：汾水、滘口、西滘、增滘、沙涌、沙洛、凤溪、渡头洲、西涌阜等。

　　上述哩啲“拈花惹草”同“依山傍水”嘅路名、地名，分布喺芳村地区嘅每个角落，有啲已经有上千年历史，有啲只系近哩几十年先至起嘅，但无论前人还系后人，起名时始终都系保持咗“水秀花香”哩个地方传统特色。

　　（原标题：水秀花香芳村名）