□见山见水

　　阿三不肯出门兜，丽丽只好约了小姊妹美美，一道去徐家汇。

　　美美是丽丽公司里同事，两家头邪气要好，伊岁数比丽丽小蛮多，就是欢喜搭丽丽一道白相。美美啦老公是做生意咯，一日到夜勒了外头跑，今朝去广东，明朝去湖南，反正蹲了屋里厢咯日脚呒没几天，所以伊经常叫一帮小姊妹到屋里厢撮麻将，丽丽是伊必叫咯阿姐。听到丽丽勒浪电话里叫伊一道去徐家汇兜白相，心里勿要太适意哦。

　　俩姊妹碰头后，喊了部差头就朝徐家汇去了。本来，丽丽想乘地铁去咯，美美讲，“乘啥地铁，喊差头喊差头，我来请侬。只棺材赚仔钞票，总归要帮伊用塌点。 ”丽丽晓得伊存心让自家不要太吃力，不过也讲出了实情，伊拉老公虽然赚了不少钞票，但是呒没空陪伊，弄得伊一直郁闷。好在美美天性爽气，就用钞票买开心了。

　　半个钟头，两家头到了徐家汇。

　　[关键词]差头，口语，指出租车。只棺材，俗语，一般代指男人。