广是广非

　　□江晖(盘福路)

　　睇新闻话番禺莲花旅游文化节举办之时，联合有关单位举办肚皮舞大赛，而报道该新闻嘅媒体更喺该题目用上“斗艳”一词，令人震撼。众所周知，莲花山供奉观音菩萨，系一个佛教地方，应该纯洁神圣，点可以搞成肚皮舞斗艳之地呢？

　　有人可能会质疑我思想保守，但系举办方不妨仔细考虑几个问题：第一，莲花山系一个有佛教色彩嘅场所，好多人会专程去拜观音菩萨，肚皮舞比赛会唔会破坏庄严嘅氛围？第二，肚皮舞者衣着暴露，而且比赛时更系摆各种婀娜姿态吸引眼球，呢方面同佛教思想完全不符；第三，肚皮舞比赛虽然为莲花山旅游节带来噱头，但两种文化太过强烈嘅冲击又系咪适合呢？

　　当然，可能举办方同好多市民都唔会觉得咁样做有咩问题。举办方可能冇考虑到莲花山嘅佛教文化背景，也觉得肚皮舞系一种健康嘅娱乐项目，甚至会觉得呢种激烈嘅碰撞更加吸引大众参与。但系，我认为呢个文化冲击不利于建立莲花山嘅旅游形象。建立、发展一个形象，系应该顺从佢嘅历史背景同埋已深入民心嘅文化形象。发展呢回事，一开坏个头，以后要行上正轨，就比较吃力嘞。